Agenda a Chofnodion

Cytunwyd ar y Cynghorydd Chris Holley fel Cynullydd y Panel Gwella Gwasanaethau, Adfywio a Chyllid ar gyfer 2024/25.

www.abertawe.gov.uk/DatgeliadauBuddiannau

Nid oedd unrhyw ddatgeliadau o fuddiannau personol a rhagfarnus.

Dim.

Derbyn nodiadau’r cyfarfod(ydd) blaenorol a chytuno eu bod yn gofnod cywir.

Cytunwyd ar gofnodion y cyfarfod blaenorol.

Gellir cyflwyno cwestiynau’n ysgrifenedig i’r adran graffu craffu@abertawe.gov.uk tan ganol dydd ar y diwrnod gwaith cyn y cyfarfod. Cwestiynau ysgrifenedig sy’n cael blaenoriaeth. Gall y cyhoedd ddod i’r cyfarfod a gofyn cwestiynau’n bersonol os oes digon o amser. Mae’n rhaid bod cwestiynau’n berthnasol i eitemau ar ran agored yr agenda a byddwn yn ymdrin â hwy o fewn cyfnod o 10 munud.

Ni ofynnwyd unrhyw gwestiynau gan y cyhoedd.

Y Cynghorydd David Hopkins - Aelod y Cabinet dros Wasanaethau Corfforaethol a Pherfformiad

Tom Evans - Rheolwr Creu Lleoedd a Chynllunio Strategol

Daeth Matthew Brushett o Archwilio Cymru a Tom Evans i roi trosolwg ac ateb cwestiynau. Nodwyd y canlynol –

·       Dyma adroddiad cenedlaethol sy'n ystyried sut mae pob cyngor yng Nghymru yn cefnogi ac yn annog addasu eiddo gwag a thir llwyd, neu safleoedd a ddatblygwyd yn flaenorol, at ddibenion gwahanol, a’u hadfywio ar ffurf cartrefi.

·       Gwnaeth Archwilio Cymru dri argymhelliad i gynghorau y mae Cyngor Abertawe wedi ymateb iddynt. Gwnaeth Archwilio Cymru ddau argymhelliad hefyd i Lywodraeth Cymru.

·       Er bod Archwilio Cymru wedi gofyn i Lywodraeth Cymru ailystyried ac ystyried y darlun cenedlaethol o ran safleoedd tir llwyd ac ailystyried sut caiff cynnydd y safleoedd hynny ei fonitro, nid oes modd i Archwilio Cymru ddylanwadu ar ddeddfwriaeth na pholisi ac mae'r adroddiad yn canolbwyntio'n bennaf ar sut gall cynghorau wella dan y fframwaith presennol.

·       Cododd y panel bryderon ynghylch safleoedd tir llwyd dan berchnogaeth breifat a chostau ychwanegol o'u cymharu â safleoedd maes glas a allai atal datblygwyr.

·       Dywedodd swyddogion y cyngor fod ganddynt ymagwedd ragweithiol, bod prosesau cadarn ar waith i fanteisio i'r eithaf ar gyllid a chydweithredu, a bod hyfywedd safleoedd yn cael ei ddadansoddi'n fanwl.

·       Nododd y panel fod gan Gyngor Abertawe hanes da o adfywio safleoedd tir llwyd gyda chymorth cyllid grant, ac argymhellodd y gallai'r cyngor ddefnyddio dull mwy rhagweithiol o gynnwys cynghorwyr yn y Cynllun Datblygu Lleol wrth nodi safleoedd tir llwyd mewn wardiau.

Y Cynghorydd David Hopkins - Aelod y Cabinet dros Wasanaethau Corfforaethol a Pherfformiad

Richard Rowlands - Rheolwr Cyflwyno Strategol a Pherfformiad

Daeth Rachel Harries o Archwilio Cymru a Richard Rowlands i roi trosolwg ac ateb cwestiynau. Nodwyd y canlynol –

·       Mae'r adroddiad gan Archwilio Cymru yn ymwneud â sut mae'r cyngor yn defnyddio gwybodaeth am berfformiad, yn deall barn defnyddwyr gwasanaethau, canlyniadau gweithgareddau'r Cyngor a pha wybodaeth sy'n cael ei rhannu ag uwch-arweinwyr i'w helpu i ddeall safbwyntiau defnyddwyr gwasanaeth.

·       Bydd adroddiad cryno cenedlaethol o bob un o'r 22 gyngor yn cael ei gyhoeddi ym mis Gorffennaf. Dywedodd swyddogion y cyngor eu bod wedi croesawu'r adroddiad; o ganlyniad i hynny, maent wedi cynnal arolwg diweddar o breswylwyr, maent yn cymryd rhan mewn arolwg cenedlaethol o drigolion a drefnir gan Gymdeithas Llywodraeth Leol Cymru ac maent wedi cynnwys gwybodaeth fwy ansoddol i ategu'r mesurau meintiol. 

·       Roedd aelodau'r panel yn teimlo bod cymharu data dros amser yn llawer anos heb fesurau perfformiad cyson. Gwnaethant hefyd gyfeirio at waith craffu ym maes perfformiad na chafodd ei nodi yn adroddiad Archwilio Cymru.

Nodwyd y cynllun gwaith.