Manylion y mater

Ar 15 Rhagfyr 2016 cymeradwyodd y Cabinet gynlluniau Cyngor Dinas a Sir Abertawe i adnewyddu ei holl wasanaeth EOTAS yn sylweddol i ddarparu arfer sy'n arwain y sector. Y nod yw ail-lunio'r gwasanaeth er mwyn datblygu arfer da presennol, a thrawsnewid y ddarpariaeth i gefnogi plant diamddiffyn a'u teuluoedd ac i fodloni'r gofyn i ddarparu addysg amser llawn addas yn brydlon i'r plant a'r bobl ifanc y mae angen iddynt gael addysg mewn lleoliad heblaw'r ysgol. Mae'n rhaid ystyried hyn hefyd yng nghyd-destun y polisi cenedlaethol sy'n datblygu, gan gynnwys yr adroddiad diweddar gan Estyn (Mehefin 2016) yn ogystal â phwysau cyllidebol cenedlaethol a lleol.

Roedd argymhellion a gyflwynwyd ym mis Rhagfyr 2016 yn cynnwys cynnig i ailstrwythuro Uned Atgyfeirio Disgyblion Abertawe'n dri llinyn (ABC), er mwyn cyflwyno addysg mewn awyrgylch dysgu sy'n addas at y diben.

Cymeradwywyd datblygiad cynllun am Uned Atgyfeirio Disgyblion newydd ar dir yn Heol y Cocyd a chyflwyniad cais cynllunio manwl gan y Cabinet ym mis Gorffennaf 2017.

Cymeradwywyd caniatâd cynllunio ar gyfer dymchwel 3 adeilad ar y safle ac adeiladu cyfleuster pwrpasol 3500m² ym mis Mawrth 2018.

Byddai'r cyfleuster newydd arfaethedig mewn un adeilad a fydd yn rhoi darpariaeth benodol ar gyfer pob Uned Atgyfeirio Disgyblion. Fe'u gwahenir yn briodol a bydd gan bob un fynediad addas i gyrtiau mewnol. Yn allanol, bydd gan bob un fynediad i'w leoedd hamdden dynodedig, a bydd digon o fannau casglu a gollwng ar gyfer cerbydau. Bydd swyddfa gweithio ystwyth addas yn yr adeilad ar gyfer y tîm Cefnogi Ymddygiad a'r tîm Tiwtora Gartref er mwyn darparu mwy o gefnogaeth effeithiol ar y safle.