Agenda a Chofnodion

Penderfynwyd penodi'r Cynghorydd M B Lewis yn Is-gadeirydd am weddill flwyddyn ddinesig 2019-2020.

www.abertawe.gov.uk/DatgeluCysylltiadau

Yn unol â'r Côd Ymddygiad a fabwysiadwyd gan Ddinas a Sir Abertawe, datganwyd y buddiannau canlynol: -

I Guy – Yr agenda yn ei chyfanrwydd – Aelod o’r Cynllun Pensiwn Llywodraeth Leol – personol.

D White – yr agenda yn ei chyfanrwydd – Aelod o'r Cynllun Pensiwn Llywodraeth Leol – personol.

Y Cynghorydd M B Lewis - yr agenda yn ei chyfanrwydd - aelod o'r Cynllun Pensiwn Llywodraeth Leol - personol.

Swyddogion:

J Dong – yr agenda yn ei chyfanrwydd – Aelod o'r Cynllun Pensiwn Llywodraeth Leol – personol.

K Cobb – yr agenda yn ei chyfanrwydd – Aelod o'r Cynllun Pensiwn Llywodraeth Leol – personol.

S Williams – yr agenda yn ei chyfanrwydd – Aelod o'r Cynllun Pensiwn Llywodraeth Leol – personol.

A Lowe – yr agenda yn ei chyfanrwydd – Aelod o'r Cynllun Pensiwn Llywodraeth Leol – personol.

Cymeradwyo a llofnodi, fel cofnod cywir, gofnodion y cyfarfod(ydd) blaenorol.

Penderfynwyd cymeradwyo a llofnodi cofnodion cyfarfod y Bwrdd Pensiwn Lleol a gynhaliwyd ar 13 Chwefror 2020 fel cofnod cywir.

Cyn cyflwyno eitem y Cynllun Archwilio, darparodd y Dirprwy Brif Swyddog Cyllid/Dirprwy Swyddog Adran 151 y diweddariadau canlynol:

·                     Soniodd am y datblygiadau diweddar ar lefel cynllun cenedlaethol a sut roedd yr adran Gweinyddu Pensiynau wedi ymdopi yn ystod argyfwng COVID-19 wrth  ymdrin ag aelodau presennol cynllun y gronfa bensiwn, yn ogystal ag aelodau gohiriedig ac aelodau gweithredol.

Gofynnodd y Cadeirydd, ar ran y Bwrdd, am roi diolch i’r holl staff sy'n sicrhau bod y gwaith yn mynd rhagddo yn ystod y cyfnod anodd hwn.

·                     Yn y cyfnod dros dro ers y cyfarfod diwethaf, cyhoeddodd y Llywodraeth ymgynghoriad a oedd yn ceisio barn ar gynigion ar gyfer mynd i'r afael â'r gwahaniaethu a nodwyd yn McLoud er mwyn mynd i'r afael â'r anghydraddoldeb hanesyddol rhwng y rhywiau wrth gael mynediad at eu pensiynau. Roedd yr ymgynghoriad ar gael tan 18 Hydref 2020 ac mae'n debygol y byddai sylwadau Abertawe yn cael eu cynnwys fel rhan o ymateb Partneriaeth Pensiwn Cymru.

Roedd y Dirprwy Brif Swyddog Cyllid/Dirprwy Swyddog Adran 151 wedi sicrhau'r bwrdd y byddent yn cael gweld yr ymateb drafft a gyflwynwyd i Bwyllgor y Gronfa Bensiwn ym mis Medi.

·                     Ar 21 Gorffennaf 2020 ymatebodd y Llywodraeth i ymgynghoriad agored mewn perthynas â chyfyngu taliadau gadael yn y sector cyhoeddus. Cyflwynodd Abertawe ei sylwadau fel rhan o ymateb Partneriaeth Pensiwn Cymru ar y cyd.

Cyflwynodd y Dirprwy Brif Swyddog Cyllid/Dirprwy Swyddog Adran 151 Gynllun Archwilio 2020 Swyddfa Archwilio Cymru (SAC) a oedd yn nodi'r gwaith archwilio arfaethedig, pryd y byddai'n cael ei wneud, faint y byddai'n ei gostio a phwy byddai'n ei wneud.

Roedd Atodiad 1 yn nodi cyfrifoldebau'r archwilydd, ynghyd â rhai'r rheolwyr a'r sawl sy'n gyfrifol am lywodraethu.  Roedd Arddangosyn 1 yn darparu tri cham y dull archwilio, roedd Arddangosyn 2 yn amlinellu'r risgiau archwilio ariannol.  Nodwyd y ffi archwilio arfaethedig ar gyfer y gwaith hwn yn Arddangosyn 3 a darparwyd yr amserlen ar gyfer yr archwiliadau arfaethedig yn Arddangosyn 5.

Darparodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' i sicrhau cydymffurfiad â Rheoliadau Cynllun Pensiwn y Llywodraeth Leol sy'n gofyn am ddatganiad strategaeth ariannu.

Prif bwrpas y Datganiad Strategaeth Ariannu oedd amlinellu'r prosesau a ddefnyddir gan yr awdurdod gweinyddu i:

·                    sefydlu strategaeth ariannu glir a thryloyw, sy'n benodol i'r Gronfa, a fyddai'n nodi sut y gellid bodloni rhwymedigaethau pensiwn cyflogwr;

·                    gefnogi'r gofyniad rheoliadol mewn perthynas â dymunoldeb cynnal cyfradd cyfraniadau sylfaenol sydd mor gyson â phosib;

·                    sicrhau bod y gofynion rheoliadol i bennu cyfraniadau er mwyn sicrhau diddyledrwydd a chost effeithlonrwydd tymor hir y Gronfa'n cael eu bodloni;

·                    ystyried ariannu rhwymedigaethau'r Gronfa'n ochelgar yn y tymor hwy.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a oedd yn ceisio cymeradwyaeth ar gyfer Cynllun Busnes Cronfa Bensiwn Dinas a Sir Abertawe 2020/21 er mwyn darparu fframwaith gweithredol ar gyfer rhaglen waith 2020/21 y Gronfa Bensiwn.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a oedd yn amlinellu'r rhaglen hyfforddiant flynyddol ar gyfer aelodau Pwyllgor y Gronfa Bensiwn, Aelodau'r Bwrdd Pensiwn Lleol a swyddogion y Gronfa Bensiwn.

Trafododd y Bwrdd ganlyniadau'r Asesiad Gwybodaeth Cenedlaethol ar-lein (NKA), ynghyd ag amrywiaeth o asesiadau a gweminarau ar-lein eraill a ddarparwyd gan Hymans Robinson.

Byddai'r Dirprwy Brif Swyddog Cyllid/Dirprwy Swyddog Adran 151 yn darparu adroddiad o ganlyniadau dienw ar yr Asesiad Gwybodaeth Cenedlaethol yng nghyfarfod nesaf y Bwrdd Pensiwn Lleol.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth', a oedd yn amlinellu'r datganiad o gyfrifon drafft ar gyfer Cronfa Bensiwn Dinas a Sir Abertawe 2019/20.

Ychwanegwyd bod swyddogion wedi cyflwyno datganiad drafft o gyfrifon wedi'i gwblhau yn unol â'r amserlen y cytunwyd arni. Roedd Archwilio Cymru wedi nodi na fyddent yn dechrau eu harchwiliad o Ddatganiad o Gyfrifon Drafft Cronfa Bensiwn Dinas a Sir Abertawe 2019/20 tan fis Medi 2020, oherwydd ymyrraeth argyfwng COVID-19, ac nid oedd hyn yn unol â'u cynllun archwilio a gyflwynwyd i Bwyllgor y Gronfa Bensiwn yn gynharach yn y flwyddyn. Fodd bynnag, byddai’n dal i fod yn unol â therfynau amser statudol Caiff eu hadroddiad ei gyflwyno i Bwyllgor y Gronfa Bensiwn ar ddiwedd yr archwiliad yn ddiweddarach yn y flwyddyn.

Darparwyd Datganiad o Gyfrifon Drafft 2019/20 yn Atodiad 1.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a oedd yn nodi'r Datgeliad Twyll a Phartïon Perthynol ar gyfer Cronfa Bensiwn Dinas a Sir Abertawe 2019/20.

Amlinellwyd, fel rhan o archwiliad statudol Archwilio Cymru o ddatganiad o gyfrifon Cronfa Bensiwn Dinas a Sir Abertawe, fod gofyn iddynt ganfod sut roedd Uwch-reolwyr yn goruchwylio ac yn rheoli cyfres o faterion a oedd yn ymwneud â phartïon perthynol, rheolaeth ariannol a rheoli twyll

Yn Atodiad 1, atodwyd datgeliad twyll a phartïon perthynol yr uwch-reolwyr ar gyfer y flwyddyn ariannol 2019/20.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a oedd yn darparu manylion toriadau a gafwyd yn y cyfnod hwn yn unol â'r polisi Adrodd am Doriadau.

Yn Atodiad A darparwyd manylion y toriadau a gafwyd ers y cyfarfod blaenorol ym mis Chwefror 2020. Amlygwyd manylion y toriadau a'r camau gweithredu a gymerwyd gan reolwyr.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth', a oedd yn amlinellu Cynllun Busnes Partneriaeth Pensiwn Cymru (PPC) 2020.

Darparwyd cynllun busnes PPC yn Atodiad 1. Roedd y cynllun yn manylu ar flaenoriaethau a meysydd ffocws PPC ar gyfer 2020/21, 2021/22 a 2022/23 ac fe'i cymeradwywyd gan Gyd-bwyllgor Llywodraethu PPC ar 12 Mawrth 2020. Ychwanegwyd bod y Cynllun Busnes yn cael ei fonitro'n gyson a chaiff ei adolygu'n ffurfiol a'i gytuno bob blwyddyn.

Esboniwyd mai diben y cynllun busnes oedd:

·                    Esbonio cefndir a strwythur llywodraethu'r PPC;

·                    Amlinellu blaenoriaethau ac amcanion y PPC dros y tair blynedd nesaf;

·                    Cyflwyno polisïau a chynlluniau'r PPC;

·                    Amlinellu'r gyllideb ariannol ar gyfer y cyfnod Cynllun Busnes perthnasol;

·                    Crynhoi Buddsoddiadau ac Amcanion Perfformiad PPC.

Roedd y Bwrdd Pensiwn Lleol yn cefnogi'r ymagwedd a gymeradwywyd gan Bwyllgor y Gronfa Bensiwn yn llawn, gan gynnwys yr ymagwedd o gynnwys aelodau'n fwy yn y PPC.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a oedd yn hysbysu'r Bwrdd o statws un o gyflogwyr ei gorff cydnabyddedig.

Amlinellwyd bod Pwyllgor y Gronfa Bensiwn wedi cymeradwyo derbyn Rathbone Training ym mis Medi 2015 a mis Rhagfyr 2015 fel cyflogwr o’r corff cydnabyddedig mewn perthynas â 7 o weithwyr a gyflogwyd yn flaenorol gan Goleg Gŵyr (4) a Chyngor Abertawe (3) (y ddau yn gyflogwyr cofrestredig â Chronfa Bensiwn Dinas a Sir Abertawe). Fel gofyniad ar gyfer derbyn, roedd yn rhaid i Rathbone Training ymrwymo i gytundeb derbyn rhwymol, ac roedd yn ofynnol i Goleg Gŵyr a Choleg Abertawe ddarparu gwarantiadau noddi'r cyflogwr mewn perthynas ag unrhyw amddifadu neu unrhyw rwymedigaethau eraill sy'n weddill pe bai cyflogwr yn methu.

Derbyniwyd hysbysiad ym mis Mai 2020 fod Rathbone Training wedi datgan diddymiad gwirfoddol gan gredydwyr. Ym mis Mai 2020, o'r 7 aelod a nodwyd, roedd 2 yn bensiynwyr, roedd 3 yn aelodau gohiriedig ac roedd 2 wedi trosglwyddo budd-daliadau. Felly, nid oedd unrhyw aelodau gweithredol presennol mewn perthynas â Rathbone Training.

Ychwanegwyd bod anfonebau yn ddyledus i Rathbone Training, fel a ganlyn: -

·         £69,048 (costau mynediad cynnar mewn perthynas â chyn-weithwyr Coleg Gŵyr a chostau actiwaraidd a ailgodir ar Goleg Gŵyr);

·         £2,050 (costau actiwaraidd a ailgodir ar gyngor Abertawe)

Roedd y rhain yn cael eu datblygu gyda'r gweinyddwyr penodedig, Begbies Traynor. Roedd actiwari'r gronfa a benodwyd, AON, wedi cael ei hysbysu ac roedd yn ymgymryd â'r prisiad statudol gofynnol ar gyfer ymadael mewn perthynas â'r cyflogwr, Rathbone. Bydd y gweinyddwyr yn adennill unrhyw rwymedigaethau sy'n weddill gan y cyflogwyr sy'n noddi, sef Coleg Gŵyr a Chyngor Abertawe, yn unol â'r cytundeb derbyn.

Cyflwynodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a oedd yn amlinellu'r diwygiadau o ran adnoddau.

Darparodd yr adroddiad fanylion yr ailstrwythuro ariannol a roddwyd ar waith ym mis Mehefin 2020 a'r ailstrwythuro/ailraddio arfaethedig ar gyfer gweinyddu pensiynau a buddsoddiadau a chyfrifyddu pensiynau.

Cadarnhawyd y byddai'r rolau yn amodol ar adolygiad Gwerthuso Swyddi.

Gofynnwyd i'r pwyllgor wahardd y cyhoedd o'r cyfarfod er mwyn iddo ystyried yr eitem(au) f/busnes a nodwyd yn argymhelliad/argymhellion yr adroddiad ar y sail ei bod/eu bod yn debygol o ddatgelu gwybodaeth eithriedig fel a nodir ym mharagraff gwahardd Atodlen 12A o Ddeddf Llywodraeth Leol 1972 fel y'i diwygiwyd gan Orchymyn Llywodraeth Leol (Mynediad at Wybodaeth) (Amrywio) (Cymru) 2007 mewn perthynas ag eitem(au) f/busnes a nodir yn yr adroddiad.

Ystyriodd y pwyllgor brawf budd y cyhoedd wrth benderfynu a ddylid gwahardd y cyhoedd o'r cyfarfod ar gyfer yr eitemau busnes lle roedd prawf budd y cyhoedd yn berthnasol fel a nodir yn yr adroddiad.

Penderfynwyd y dylid gwahardd y cyhoedd ar gyfer yr eitemau busnes canlynol.

(Sesiwn Gaeëdig)

Amlinellodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a gyflwynwyd gyntaf i Bwyllgor y Gronfa Bensiwn ar 13 Mawrth 2020, i sicrhau cydymffurfiaeth â Rheoliadau Cynllun Pensiwn y Llywodraeth Leol, sy'n mandadu cynnal prisiad actiwaraidd teirblwyddol llawn.

Darparodd y Dirprwy Brif Swyddog Cyllid/Dirprwy Swyddog Adran 151 adroddiad 'er gwybodaeth' a oedd yn rhoi'r diweddaraf i'r Bwrdd am gynnydd rhannu asedau Partneriaeth Pensiwn Cymru.

Roedd Atodiad 1 yn darparu'r cynnydd a'r adroddiad diweddaru a ddarparwyd gan weithredwr y Cynllun Cytundebol Awdurdodedig, Link Asset Services.

Darparodd Atodiad 2 Bolisi Gwrthdaro Buddiannau Drafft PPC, darparodd Atodiad 3 Bolisi Risg Hinsawdd PPC Drafft ac Atodiad 4 Datganiad Cyfrifon Drafft y PPC 2019/20.

Yn y diweddariad cyfeiriwyd at lansio cronfa incwm sefydlog cyfran 3 ar ddiwedd mis Gorffennaf 2020. Roedd Cronfa Bensiwn Dinas a Sir Abertawe yn paratoi ar gyfer y cyfnod pontio hwn.

Rhoddodd y Dirprwy Brif Swyddog Cyllid/Dirprwy Swyddog Adran 151 drosolwg o gynnydd y strategaeth fuddsoddi a gymeradwywyd gan Bwyllgor y Gronfa Bensiwn ym mis Mawrth 2019.

Rhoddodd y Dirprwy Brif Swyddog Cyllid/Dirprwy Swyddog Adran 151 drosolwg o'r adroddiad 'er gwybodaeth', a oedd yn cyflwyno Adroddiad Monitro Buddsoddiadau Chwarter 1 2020.