Agenda a Chofnodion

Derbyniwyd ymddiheuriadau gan y cynghorwyr D W Cole a D J Lewis.

www.swansea.gov.uk/disclosuresofinterests

Yn unol â'r Côd Ymddygiad a fabwysiadwyd gan Ddinas a Sir Abertawe, cyhoeddwyd y buddion canlynol:

Y Cynghorydd N J Davies – Cofnod 183 Sesiwn Holi Aelod y Cabinet: Aelod y Cabinet dros yr Amgylchedd a Chludiant - Buddiant Personol – wedi'i gyflogi gan Graham Evans & Partners LLP sy'n cynnal hawliau atebolrwydd cyhoeddus yn erbyn yr awdurdod.

Yn unol â Mesur Llywodraeth Leol (Cymru) 2011, ni chafwyd unrhyw ddatganiadau o bleidleisiau chwip na chwipiau'r pleidiau.

Cymeradwyo a llofnodi cofnodion cyfarfod Pwyllgor y Rhaglen Graffu a gynhaliwyd ar 11 Ebrill 2016 fel cofnod cywir.

PENDERFYNWYD cytuno bod cofnodion Pwyllgor y Rhaglen Graffu a gynhaliwyd ar 11 Ebrill 2016 yn gofnod cywir.

Mewn perthynas â Chofnod 166, gofynnodd aelodau am eglurhad o'r datganiad a wnaed gan Aelod y Cabinet dros Fenter, Datblygu ac Adfywio am gynnwys gwasanaethau llyfrgell, ynghyd â gwasanaethau diwylliannol eraill, yn yr ‘Hysbysiad o Wybodaeth Flaenorol’ er mwyn ceisio diddordeb partïon allanol. Cytunwyd y dylai llythyr y pwyllgor at aelod y cabinet ofyn iddo ddarparu mwy o wybodaeth am hyn, gan adlewyrchu'r sesiwn holi ac ateb.

Ni chafwyd unrhyw gwestiynau gan y cyhoedd.

Rhoddodd y Cynghorydd Hopkins sylwadau agoriadol o blaid ei adroddiad ysgrifenedig, cyn derbyn cwestiynau gan y pwyllgor.

Roedd Stuart Davies, Pennaeth Priffyrdd a Chludiant, a Chris Howell, Pennaeth Rheoli Gwastraff a Pharciau, hefyd yn bresennol ac fe wnaethant gynorthwyo'r pwyllgor gyda'r cwestiynau yn ôl y gofyn.

Arweiniodd y sesiwn holi i drafodaeth ynghylch y pynciau canlynol:

·                 Statws yr adolygiadau comisiynu perthnasol (e.e. Rheoli Gwastraff, Parciau a Glanhau, Priffyrdd a Chludiant)

·                 Perfformiad ailgylchu/pecynnu gormodol/sbwriel

·                 Ôl-groniad o atgyweiriadau ffyrdd (e.e. tyllau ffordd), archwilio a blaenoriaethu

·                 Gorfodi parcio sifil/costau i ddarparu gwasanaethau parcio

·                 Incwm Marina Abertawe/cynnal a chadw Morglawdd Tawe

·                 Cynnydd ar ddatblygu Partneriaeth Ansawdd Bysus gyda First Cymru

·                 Rheoli'r cerbydlu a rhesymoli depos

·                 Ffïoedd i gau strydoedd (e.e. dathliadau cenedlaethol/partïon stryd)

·                 Baw cŵn a gorfodi/darpariaeth a chostau biniau gwastraff cŵn

·                 Amserlenni glanhau strydoedd a thargedu

·                 Rhaglen Llwybrau Diogel i'r Ysgol/Terfynau 20 mya o gwmpas ysgolion

·                 Torri glaswellt mewn parciau/cynnal a chadw e.e. lle caiff hyn ei reoli gan grwpiau ‘ffrindiau parciau’

·                 Cost gwaith ynglŷn â lwfansau amgylcheddol cynghorwyr (e.e. pyst pren i atal parcio a diogelu ymylon ffyrdd glaswelltog)

·                 Effeithiolrwydd goleuadau stryd LED

·                 Cludiant o’r cartref i’r ysgol

Diolchwyd i'r Cynghorydd Hopkins a'r swyddogion gan y cadeirydd am ddod.

PENDERFYNWYD y dylai cadeirydd Pwyllgor y Rhaglen Graffu ysgrifennu at aelod y cabinet, gan adlewyrchu'r drafodaeth a rhannu barn y pwyllgor.

Rhoddodd y Cynghorydd Mary Jones, Cynullydd, ddiweddariad am waith Panel Perfformiad Craffu'r Bwrdd Gwasanaethau Lleol.

Yn sgîl y drafodaeth yng nghyfarfod diwethaf y pwyllgor, nododd fod gwaith y panel perfformiad wedi cwblhau ei waith erbyn hyn ac y byddai Panel Perfformiad Craffu'r Bwrdd Gwasanaethau Cyhoeddus, y corff newydd, yn cwrdd o fis Mehefin 2016.

Cyfeiriodd at brif casgliadau'r panel sydd wedi cael eu cyfleu i gadeirydd y Bwrdd Gwasanaethau Lleol, y Cynghorydd Rob Stewart (Arweinydd y Cyngor). Disgwylir i lythyr y panel gael ei ystyried gan y Bwrdd Gwasanaethau Cyhoeddus newydd pan fydd yn cwrdd am y tro cyntaf ar 17 Mai, a gobaith yr aelodau oedd y byddai'r bwrdd newydd yn derbyn barn ac argymhellion y panel.

PENDERFYNWYD y byddai'r adroddiad yn cael ei NODI.

Fel cyfarfod olaf y flwyddyn ddinesig bresennol, bu'r adroddiad yn cynorthwyo'r cynghorwyr i ystyried y gwaith a wnaed yn ystod y flwyddyn ddinesig a myfyrio ar y profiad. Cafodd y pwyllgor ei annog hefyd i ddechrau meddwl am y rhaglen waith craffu ar gyfer y flwyddyn ddinesig nesaf.

Darparodd yr adroddiad y canlynol i'r pwyllgor:

·       Crynodeb o waith y pwyllgor a'r rhaglen waith craffu gyffredinol (gan gynnwys cynnydd y paneli a'r gweithgorau amrywiol).

·       Adborth am berfformiad craffu a'r arolwg cynghorwyr blynyddol.

·       Crynodeb o weithgareddau gwella a wnaed.

·       Rhestr o waith rhagorol y gellir ei gario drosodd.

·       Blaengynllun y Cabinet ar gyfer cyfleoedd am graffu cyn penderfynu.

Gwahoddwyd yr aelodau i roi eu barn am y rhaglen waith a'u profiad o graffu er mwyn helpu i werthuso pa mor llwyddiannus mae pethau wedi bod a nodi meysydd i'w gwella. Ystyriodd y pwyllgor yr wybodaeth a ddarparwyd a chodwyd y materion canlynol yn ystod trafodaethau:

·       Trawsnewid Panel y Gwasanaethau Cymdeithasol i Oedolion – Cyfeiriodd cynullydd y panel, y cynghorydd Uta Clay, at waith y panel dros y 18 mis diwethaf a'i lythyr cloi at Aelod y Cabinet dros Oedolion a Phobl Ddiamddiffyn a gaiff ei gyflwyno i'r pwyllgor.

·       Y Cynghorydd Cyfranogi wrth Graffu – Teimlodd y pwyllgor y dylai mwy o gynghorwyr gymryd rhan wrth graffu. Nodwyd mai canran y cynghorwyr mainc gefn a fu'n cymryd rhan dros y flwyddyn ddiwethaf oedd 79% (49 o 62).

·       Craffu cyn penderfynu – Rhannodd aelodau'r pwyllgor brofiadau o graffu cyn penderfynu a mynegwyd peth pryder ynglŷn ag effeithiolrwydd y broses gyfredol. Roedd pryderon penodol yn ymwneud â'r amserlenni a ddarperir ar gyfer craffu a sut mae'r Cabinet yn ymateb i farn pobl. Nodwyd y gwaith craffu cyn penderfynu diweddar o'r Gwasanaeth Cerdd i Ysgolion fel enghraifft. Gofynnodd rhai aelodau am eglurhad o ddiben craffu cyn penderfynu a'r disgwyliadau ar gyfer y Cabinet mewn ymateb i bryderon/argymhellion craffu cyn penderfynu. Teimlwyd y gallai gohirio penderfyniad y Cabinet fod yn briodol er mwyn ystyried barn y tîm craffu'n llawn.

Nododd y pwyllgor ragor o wybodaeth am adroddiad disgwyliedig y Cabinet am ‘Sgwâr y Castell – Datblygu a Chyfleoedd ar gyfer Mannau Cyhoeddus’ ac fe ystyriwyd a ddylid cyflwyno cais am graffu cyn penderfynu. Bu peth pryder ynglŷn â'r cynnig i farchnata'r safle fel man cyhoeddus pwysig, mewn ymateb i ddiddordeb gan ddatblygwyr.

Cafodd aelodau'r pwyllgor eu hatgoffa gan y cadeirydd am y gynhadledd cynllunio gwaith craffu flynyddol a oedd i'w chynnal ar 12 Mai. Nododd hi fod cadeirydd y Pwyllgor Archwilio ac aelodau cyffredin y Pwyllgor Safonau wedi cael eu gwahodd i'r gynhadledd hefyd i roi safbwynt annibynnol/cyhoeddus ar waith yn y dyfodol.

PENDERFYNWYD y dylid:

1)       cymeradwyo cylch gorchwyl yr Ymchwiliad Craffu Trechu Tlodi;

2)       gofyn am graffu cyn penderfynu ar gyfer adroddiad disgwyliedig y Cabinet ar ‘Sgwâr y Castell – Datblygu a Chyfleoedd ar gyfer Mannau Cyhoeddus’ (a nodwyd ym mlaengynllun y Cabinet ar gyfer 16 Mehefin) – dylid trefnu cyfarfod Pwyllgor y Rhaglen Graffu cyn gynted â phosib; a

3)       threfnu cyfarfod rhwng cadeirydd Pwyllgor y Rhaglen Graffu ac aelod perthnasol y cabinet i drafod y broses graffu cyn penderfynu a gwelliannau posib.

Adroddwyd am fynegiadau o ddiddordeb ymhlith cynghorwyr craffu ar gyfer corff newydd Panel Perfformiad Craffu'r Gwasanaethau Cymdeithasol i Oedolion er mwyn cytuno arnynt. Adroddwyd bod y Cynghorydd Peter Black a'r Cynghorydd Uta Clay wedi mynegi diddordeb mewn gweithredu fel cynullydd.

PENDERFYNWYD ar y canlynol:

1)       Dylid cytuno ar aelodaeth Panel Perfformiad Craffu Gwasanaethau Cymdeithasol i Oedolion fel a ganlyn:

Cynghorwyr Llafur: 6

Cynghorwyr y Democratiaid Rhyddfrydol: 3

Cynghorydd Annibynnol: 1

Cynghorydd y Ceidwadwyr: 1

2)       Bydd y panel yn dewis y cynullydd yn ei gyfarfod cyntaf, i'r pwyllgor gytuno arno.

Adroddodd y cadeirydd am y log llythyrau craffu a chyfeiriodd at yr ohebiaeth ddiweddar rhwng aelodau'r Tîm Craffu ac aelodau'r Cabinet.  Roedd hyn yn cynnwys llythyr cloi Panel Perfformiad Craffu'r Bwrdd Gwasanaethau Lleol a'r ymateb.

PENDERFYNWYD y dylid NODI log llythyrau'r Tîm Craffu.

Roedd yn bleser gan y cadeirydd i gyfeirio at roi Tîm Craffu Abertawe ar y rhestr fer ar gyfer y Wobr Cyflawniad Cyfnodolyn Dinesig cenedlaethol yn y categori ‘Rhagoriaeth mewn Llywodraethu a Chraffu’. Myfyriodd ar y ‘diwrnod dyfarnu’ yn Llundain pan aeth hi a'r Cynghorydd Clive Lloyd (Aelod y Cabinet dros Drawsnewid a Pherfformiad) a Dave Mckenna (Rheolwr Craffu) i'r seremoni ar 28 Ebrill. Roedd hi'n fodlon ar y cyflwyniad a roddwyd i'r beirniaid a oedd, yn ei thyb hi, wedi cael ei dderbyn yn dda, a hefyd ar y profiad. Nododd y byddai'r Seremoni Wobrwyo'n cael ei chynnal ar 16 Mehefin y byddai hi, y Cynghorydd Terry Hennegan a'r Cynghorydd Paxton Hood-Williams yn mynd iddi.

Annual Scrutiny Work Planning Conference – 12 May 2016,

4.00 pm, Lord Mayor’s Reception Room, Guildhall.

Adroddodd y cadeirydd am y Gynhadledd Cynllunio Gwaith Craffu Flynyddol sydd i'w chynnal ar 12 Mai 2016, 4.00 pm, Ystafell Dderbyn yr Arglwydd Faer, Neuadd y Ddinas.

PENDERFYNWYD y dylid NODI Cynllun Gwaith y Pwyllgor Archwilio.

Rhoddwyd dyddiad ac amser cyfarfodydd paneli/gweithgorau sydd ar ddod, er gwybodaeth.