Agenda a Chofnodion

www.abertawe.gov.uk/DatgeluCysylltiadau

 

Rhoddodd Dirprwy Bennaeth y Gwasanaethau Cyfreithiol a Democrataidd gyngor ynghylch y buddiannau personol a rhagfarnol posib y gallai cynghorwyr a swyddogion eu cael mewn eitemau ar yr agenda.

 

Atgoffodd Pennaeth y Gwasanaethau Democrataidd gynghorwyr a swyddogion y dylid ond llenwi'r daflen "Datgeliadau o fuddiannau personol a rhagfarnol" os oes gan y cynghorydd/swyddog fudd i'w ddatgan. Nid oedd angen dychwelyd ffurflenni os nad oedd unrhyw beth i'w ddatgan. Hysbyswyd cynghorwyr a swyddogion hefyd y dylid datgan unrhyw fudd ar lafar ac yn ysgrifenedig ar y daflen.

 

Yn unol â darpariaethau'r Côd Ymddygiad a fabwysiadwyd gan Ddinas a Sir Abertawe, datganwyd y buddiannau canlynol:

 

Cynghorwyr

 

1)            Datganodd y Cynghorydd J E Burtonshaw fudd personol yng Nghofnod 80 “Datganiad Cyllideb Canol Tymor 2016/17”;

 

2)            Datganodd y Cynghorwyr C Anderson, M C Child, C A Holley, P M Meara a M Thomas fudd personol yng Nghofnod 82 “Adroddiad Blynyddol 2015/16 -Cyfarwyddwr y Gwasanaethau Cymdeithasol”;

 

3)            Datganodd y Cynghorydd A S Lewis fudd personol yng Nghofnod 83 "Aelodaeth Pwyllgorau";

 

4)            Datganodd M Thomas fudd personol a rhagfarnol yng Nghofnod 83 "Cwestiynau Cynghorwyr - Cwestiwn 8" a  gadawodd y cyfarfod cyn ei ystyried.

 

5)            Datganodd y Cynghorydd C L Philpott fudd personol yng Nghofnod 85 "Hysbysiad o Gynnig".

 

Swyddogion

 

1)            Datganodd Phil Roberts (Prif Weithredwr) fudd personol yng nghofnod 82 “Adroddiad Blynyddol 2015/16 - Cyfarwyddwr y Gwasanaethau Cymdeithasol”.

Cymeradwyo a llofnodi cofnodion y cyfarfod(ydd) blaenorol fel cofnod cywir.

PENDERFYNWYD cymeradwyo'r cofnodion canlynol a'u llofnodi fel cofnod cywir:

 

1)            Cyfarfod cyffredin o'r cyngor a gynhaliwyd ar 22 Medi 2016.

Cyflwynodd Pennaeth Dros Dro'r Gwasanaethau Cyfreithiol a Democrataidd adroddiad gwybodaeth yn nodi'r ymatebion ysgrifenedig i gwestiynau a ofynnwyd yn y cyfarfod cyffredin diwethaf o'r cyngor.

Llongyfarchiadau

 

a)            Gwobrau Gwaith Cymdeithasol Cymdeithas Brydeinig y Gweithwyr Cymdeithasol (BASW) Cymru 2016

 

Roedd yr aelod llywyddu'n falch iawn o gyhoeddi y bu nifer o swyddogion y cyngor yn llwyddiannus yng Ngwobrau Gwaith Cymdeithasol BASW Cymru 2016.  Mae'r gwobrau poblogaidd hyn sydd bellach yn eu 7^fed blwyddyn yn agored i weithwyr cymdeithasol yng Nghymru; p'un ai ydynt yn aelodau BASW neu beidio.  Mae Gwobrau Gwaith Cymdeithasol BASW Cymru'n ceisio hyrwyddo agweddau cadarnhaol ar y proffesiwn Gwaith Cymdeithasol, arfer gwaith cymdeithasol a sefydliadau cefnogol.

 

Enillodd Vanessa Chambers y Wobr Ysbryd Gwaith Cymdeithasol ar gyfer yr arweiniad "I am me" a ddatblygwyd ganddi sy'n ymwneud ag arwain plant i ddeall eu taith drwy fywyd.

 

Derbyniodd Dîm Maethu Abertawe Dystysgrif Cyflawniad ar gyfer y Wobr Tîm Gwaith Cymdeithasol.

 

Roedd Vanessa Chambers, Amanda Etherington, Martin Chapman a Thîm Maethu Abertawe'n bresennol i dderbyn eu gwobrau.

1)            Ymweliad Masnach â Tsieina

 

Nododd arweinydd y cyngor fod yntau, yr Arglwydd Faer a'r Arglwydd Faeres wedi bod ar ymweliad masnach ddiweddar â Tsieina.  Roedd y daith yn cynnwys ymweliadau â Shanghai, Nantong a Wuhan.  Nododd fod yr ymweliadau masnach wedi bod yn werth chweil ac y byddai ymweliadau gan gynrychiolwyr o Tsieina'n digwydd yn y flwyddyn newydd.

 

2)            Tân yng Nghampws Tŷ Coch, Coleg Gŵyr Abertawe

 

Diolchodd arweinydd y cyngor i swyddogion y cyngor am eu gwaith gwych wrth gynorthwyo Coleg Gŵyr Abertawe yn dilyn y tân diweddar ar eu campws yn Nhŷ Coch.

 

3)            Bargen Ddinesig

 

Rhoddodd arweinydd y Cyngor y diweddaraf am y Fargen Ddinesig.

Rhaid i'r cwestiynau ymwneud â materion ar ran agored agenda'r cyfarfod, ac ymdrinnir â hwy o fewn 10 munud.

Gofynnwyd sawl cwestiwn gan aelodau'r cyhoedd.  Ymatebodd Aelod perthnasol y Cabinet yn briodol.  Rhestrir y cwestiynau hynny a oedd yn gofyn am ymateb ysgrifenedig isod:

 

1)        Gofynnodd David Davies gwestiwn i Aelod y Cabinet dros y Gwasanaethau i Blant a Phobl Ifanc yn ymwneud â Chofnod 82 “Adroddiad Blynyddol 2015/16 – Cyfarwyddwr y Gwasanaethau Cymdeithasol”:

 

i)             Tudalen 69 "Dinas sy'n Gofalu", Paragraff 2.

 

"Mae'n arbennig o bleserus i ddarllen y geiriau bod ein dinas yn cael ei chydnabod fel rhywle llawn gobaith, sy'n noddfa o gasineb neu erledigaeth. Ers Prydael, mae troseddau casineb wedi cynyddu, wedi'u hannog gan iaith gwleidyddion sy'n hyrwyddo eu hideoleg ddiegwyddor eu hunain.  Rwyf wedi bod yn dyst i ddau achos o hiliaeth eithafol yr wyf yn mynd ar eu trywydd.  Mae'r teimladau a ddaw o Stori Abertawe yn ysbrydoliaeth.

 

A allai'r Uwch-swyddogion a'r Aelodau Cabinet sy'n gyfrifol, gael eu cydnabod fel enghreifftiau o'r hyn sy'n dda yn ein cymdeithas heddiw, ac a fydd modd datgelu pwy ydyn nhw yn ein cyfarfod nesaf?"

 

Nododd Aelod y Cabinet dros y Gwasanaethau Plant a Phobl Ifanc y byddai datganiad ysgrifenedig yn cael ei ddarparu.

Tynnwyd yr eitem yn ôl.

Cyflwynodd Swyddog Adran 151 adroddiad  a oedd yn amlinellu perfformiad ariannol y flwyddyn gyfredol ynghyd ag asesiad wedi'i ddiweddaru o'r gofynion arbedion sy'n debygol dros gyfnod y Cynllun Ariannol Tymor Canolig.

 

Rhoddodd Arweinydd y cyngor ei ymateb i'r datganiad ar ffurf cyflwyniad i'r cyngor.

 

PENDERFYNWYD y dylid:

 

1)            odi'r sylwadau a wnaed yn yr adroddiad a mabwysiadu'r rhagolwg adnoddau diwygiedig a'r rhagolwg o bwysau gwario o ran cynllunio'r gyllideb yn y dyfodol;

 

2)            Nodi'r rhagolwg ariannol o ran y flwyddyn gyfredol a'r camau gweithredu y bydd eu hangen er mwyn symud tuag at gymeradwyo alldro refeniw mwy cytbwys ar gyfer 2015-2016.

 

3)            Nodi'r sylwadau am y cyllid ar gyfer y Rhaglen Gyfalaf a amlinellir yn yr adroddiad, a pharhau i fynd i'r afael â'r diffyg ariannol drwy bolisi sy'n cwmpasu'r holl asedau sy'n cael eu gwerthu.

Cyflwynodd Swyddog Adran 151 adroddiad a oedd yn amlinellu adolygiad canol blwyddyn o sefyllfa'r Refeniw Wrth Gefn a chytuno ar unrhyw ailddosbarthiad o'r cronfeydd wrth gefn yn seiliedig ar ofynion presennol.

 

PENDERFYNWYD:

 

1)            Cymeradwyo ailddosbarthu'r cronfeydd wrth gefn a glustnodwyd:

 

Categori'r Gronfa Wrth Gefn a Glustnodwyd	Gweddill Cyfredol 31/3/15 £’000	Newid Arfaethedig   £’000	Sefyllfa Argymelledig   £’000
Technegol/Trydydd Parti	1,027	0	1,027
Yswiriant	14,092	0	14,092
Gwerthuso swyddi	0	2,500	2,500
Trawsnewidiad ac effeithiolrwydd	2,292	0	2,292
Cronfeydd wrth gefn dirprwyedig ysgolion	9,547	0	9,547
Cronfeydd wrth gefn cyfartalu	52	0	52
Symiau gohiriedig	5,122	0	5,122
Cronfeydd atgyweirio ac adnewyddu	2,935	0	2,935
Cyfran yr elw o eiddo a werthwyd	1,121	0	1,121
Cronfeydd wrth gefn y gwasanaeth a glustnodwyd	4,840		4,840
Cronfeydd cyfalaf wrth gefn	5,496	0	5,496
Cronfa wrth gefn costau ailstrwythuro	9,497	-2,500	6,997
Cyfanswm y cronfeydd wrth gefn a glustnodwyd	56,021	0	56,021

 

Cyflwynodd Cyfarwyddwr y Gwasanaethau Cymdeithasol ei Adroddiad Blynyddol ar gyfer 2015-2016 er gwybodaeth.

Cyflwynodd Aelod y Cabinet dros Drawsnewid a Pherfformiad adroddiad a oedd yn ceisio cymeradwyaeth ar gyfer enwebiadau/diwygiadau i aelodaeth cyrff y cyngor.  Ychwanegodd Pennaeth y Gwasanaethau Democrataidd ar lafar rai newidiadau ychwanegol hwyr i aelodaeth pwyllgorau.

 

Cyfeiriodd at yr adroddiad gan nodi bod Arweinydd y Cyngor hefyd wedi gwneud y newidiadau canlynol i aelodaeth cyrff allanol yr awdurdod:

 

1)            Cytundeb rhwng Awdurdodau ar gyfer Gwastraff Bwyd

Tynnu enw'r Cynghorydd M C Child;

Ychwanegu'r Cynghorydd A S Lewis.

 

PENDERFYNWYD diwygio aelodaeth cyrff y cyngor a restrir isod fel a ganlyn:

 

1)            Pwyllgor Cynghori'r Cabinet ar Ddatblygu

Tynnu enwau'r Cynghorwyr P M Matthews a G J Tanner.

Ychwanegu'r Cynghorwyr J C Bayliss ac N M Woollard.

 

2)            Pwyllgor Cynghori'r Cabinet ar Ataliaeth a Gofal Cymdeithasol

Tynnu enwau'r Cynghorwyr C R Doyle a J A Hale.

Ychwanegu'r Cynghorwyr J C Bayliss ac E T Kirchner.

 

3)            Ymweliadau Rota'r Gwasanaethau Cymdeithasol

Tynnu enwau'r Cynghorwyr V M Evans, B Hopkins a P B Smith.

Ychwanegu'r Cynghorwyr J C Bayliss, N M Woollard a Swydd Wag Grŵp Annibynnol.

 

4)            Panel Ymddiriedolwyr

Tynnu enw'r Cynghorydd D J Lewis.

Ychwanegu Swydd Wag Grŵp Annibynnol.

1)         ‘Cwestiynau Atodol’ Rhan A

 

Cyflwynwyd wyth (8) 'Cwestiwn Atodol' Rhan A. Ymatebodd Aelod(au) perthnasol y Cabinet ar ffurf atebion ysgrifenedig a gynhwyswyd yng Ngwŷs y Cyngor.

 

Roedd ymateb ysgrifenedig yn ofynnol ar gyfer y cwestiwn/cwestiynau atodol canlynol.

 

Cwestiwn 1

 

a)            Gofynnodd y Cynghorydd M. H. Jones y canlynol:

 

i)             "Gŵyl Gerdd a Chelfyddydau Ryngwladol Abertawe.  A yw'r toriadau ariannol wedi cael unrhyw effaith andwyol?"

 

ii)            "Allwch chi esbonio pam rydym yn talu £31,500 ar gyfer Arddangosfa Dylan Thomas, sy'n rhaglen a ariennir gan Gronfa Dreftadaeth y Loteri, a £143,000 ar gyfer Canolfan Dylan Thomas?"

 

iii)           "Mae Abertawe'n aelod o Rwydwaith Dinasoedd Iach Ewrop.  Beth yw'r costau sy'n gysylltiedig â hyn a pha fudd a ddaw ohono i Abertawe?"

 

Nododd Aelod y Cabinet dros Fenter, Datblygu ac Adfywio y darperir ymateb ysgrifenedig.

 

b)           Gofynnodd y Cynghorydd P M Black y canlynol:

 

i)             "Pam y mae naid fawr yn y cyllid ar gyfer Neuadd Brangwyn pan fo'r rhaglen gerddoriaeth wedi'i therfynu?"

 

ii)            Pam y bu cynnydd yn y cyllid ar gyfer Canolfan Dylan Thomas pan ariennir yr arddangosfa ar wahân gan Gronfa Dreftadaeth y Loteri?"

 

Nododd Aelod y Cabinet dros Fenter, Datblygu ac Adfywio y darperir ymateb ysgrifenedig.

 

Cwestiwn 6

 

Gofynnodd y Cynghorydd J W Jones,

 

"A yw'r arian a fenthycir yn cael ei gronni er mwyn ei ddefnyddio yn y dyfodol?  Ar gyfer beth y defnyddir y benthyciad hwn?”

 

Nododd Aelod y Cabinet dros Wasanaethau'r Genhedlaeth Nesaf y darperir ymateb ysgrifenedig.

 

 

Cwestiwn 7

 

Gofynnodd y Cynghorydd I M Richards:

 

"Mewn cyfarfod â'r gymuned yn ddiweddar iawn, nododd pedwar o uwch-reolwyr prosiect INNOGY y byddai'r prosiect (os caiff ei gyflawni o gwbl) yn 33.6 MW ac nid fel yr oeddent bob amser wedi dweud yn flaenorol sef 48MW (er ei fod yn dweud 32MW i 48MW ym mhrint mân cudd y Cais Cynllunio).

 

Gofynnaf am eglurhad a'r ffigurau gwirioneddol; nid hen ffigurau:

 

Dylai'r ffigur manwl gywir terfynol yn yr ateb i'r cyngor adlewyrchu'r ffigur gallu gwirioneddol a bennwyd yn awr sef 33.6MW.

 

Yn y cyfarfod cymunedol diweddar hwn, derbyniodd INNOGY hefyd, heb anghytuno, y byddai allbwn cyfartalog Mynydd y Gwair bellach yn 8MW yn unig.

 

Cadarnhaodd INNOGY hefyd y byddai gostwng y gallu cynhyrchu o 48MW i 33.6MW yn lleihau'r Gronfa Gymunedol o £240,000 i £168,000 y flwyddyn. (£72,000 yn llai!).

 

Nawr ceir y darn cymhleth, sy'n cael ei 'newid' gan yr holl gynhyrchwyr Ynni Adnewyddadwy, sef y ffaith fod ganddynt Gontractau Tystysgrif Rhwymo i Ynni Adnewyddadwy. Mae hyn yn golygu bod y Grid Cenedlaethol Pŵer Trydan yn gorfod derbyn y cyfan maent yn ei gynhyrchu. Mae eu hallbynnau'n amrywio drwy'r amser oherwydd amodau gwynt a haul anwadal ac nid oes modd eu rhagweld yn union.  Felly, yn syml, mae'r rhaid i ffynonellau pŵer eraill "ildio", a pho fwyaf y ffynonellau ynni adnewyddadwy y cawn, mwyaf cymhleth yw'r sefyllfa. Mae gweithrediad pŵer glo yn rhy araf i ildio. Mae ynni niwclear yn rhy anniogel i'w drin yn ddi-hid, felly ni all ildio.  Felly, pŵer nwy sy'n ildio am ei fod yn gallu ymateb yn gyflym i alw ac ymateb yn gyflym wrth gynyddu neu leihau pŵer.

 

Mae'r grid yn gynhwysor cymhleth iawn. Yn y chwe degau pan fûm yn gweithio yng Nghwmni Dur Cymru (SCOW), byddem o bryd i'w gilydd yn cael galwadau ffôn brys gan y Grid Cenedlaethol i atal ein melin oeri a rholio dur  i ganiatáu i'r Grid gynnal llif yn ystod argyfwng pŵer. Yr enw ar hyn oedd colli llwyth.  Roedd yr un felin hon yn defnyddio'r un faint o ynni a thref ddomestig maint Castell-nedd, a byddai SCOW yn derbyn iawndal.  Nawr mae ganddynt "ynni troelli wrth gefn”, cronfa wrth gefn wastraffus a chostus.

 

Felly beth gaiff ei wneud; maen nhw'n arafu'r mewnbwn hawsaf ei reoli - pŵer nwy i ganiatáu derbyn y rhai adnewyddiadau dan eu contractau rhwymo.  Y darn cymhleth yw bod y Datblygwyr Adnewyddadwy ar lefelau presennol eu hallbynnau yn rhoi ystadegau arbedion carbon fel pe baent yn disodli pŵer carbon pur glo (neu'r cymysgedd o bŵer). Mae'r arbedion carbon wedyn yn cael eu chwyddo fel ffigurau camarweiniol. Y gwirionedd yw eu bod yn dadleoli NWY sy'n cynnwys hydrogen yn bennaf a llawer llai o garbon, ac yn cynhyrchu ager yn bennaf ac nid carbon.  Felly roedd fy nghwestiwn yn gofyn am y ffigurau dadleoli carbon gwirioneddol yn ôl gwir sefyllfa'r Grid "sigledig".

 

Mae hyn yn rhywbeth y mae angen ei ddeall. Dyna pam dewisais y "balŵn" fel enghraifft. Dyna pam maen nhw'n nawr yn gobeithio adeiladu Gorsaf Bŵer Nwy rhwng Ward Mawr a Llangyfelach i losgi nwy o Iran a Rwsia drwy Aberdaugleddau i sefydlogi'r grid sigledig fel y daw mwyfwy o dyrbinau gwynt a phaneli solar a llanwau adnewyddadwy i mewn i'r Grid.  Ac eithrio ynni'r llanw mae'r ddau arall yn anwadal ac yn anrhagweladwy - yn y tymor byr neu'r tymor hir.

 

Hefyd wrth roi ystadegau dadleoli carbon, maent bob amser yn eu cymharu â gallu neu uchafswm ynni adnewyddadwy a byth â realiti'r allbynnau cyfartalog gwirioneddol - 25% ar gyfer gwynt a 10% ar gyfer solar ac nid yr anwiredd o 100% ar gyfer y ddau!  Gor-ddweud neu anwiredd enfawr!"

 

Nododd Aelod y Cabinet dros Fenter, Datblygu ac Adfywio y darperir ymateb ysgrifenedig.

 

Cwestiwn 8

 

Gofynnodd y Cynghorydd M. H. Jones y canlynol:

 

"A all Aelod y Cabinet roi diffiniad syml o "Drefniadau Diogelu rhag Colli Rhyddid?"

 

Nododd Aelod y Cabinet dros y Gwasanaethau i Oedolion a Phobl Ddiamddiffyn y darperir ymateb ysgrifenedig.

 

Nid oedd angen ymateb ysgrifenedig ar y cwestiynau atodol.

 

2)        ‘Cwestiynau nad oes angen Cwestiynau Atodol ar eu cyfer' Rhan B

 

Ni chyflwynwyd unrhyw 'Gwestiynau Rhan B nad oes angen Cwestiynau Atodol ar eu cyfer'.

Gwneud y cyfrifiad nesaf ar gyfer ein cymuned Lluoedd Arfog

 

 

Cynnig Drafft i gefnogi Count Them In

 

Mae'r cyngor hwn yn nodi:

 

1.     Y rhwymedigaethau sy'n ddyledus ganddo i gymuned y Lluoedd Arfog yn Ninas a Sir Abertawe fel a nodwyd yng Nghyfamod y Lluoedd Arfog; sef ni ddylai cymuned y Lluoedd Arfog wynebu anfantais wrth ddarparu gwasanaethau a bod ystyriaeth arbennig yn briodol mewn rhai achosion, yn enwedig rheiny sydd wedi rhoi fwyaf.

 

2.     Diffyg ystadegau swyddogol a chynhwysfawr ar faint, neu ddemograffeg cymuned y Lluoedd Arfog yn Ninas a Sir Abertawe. Mae hyn yn cynnwys personél rheolaidd a'r rhai wrth gefn, cyn-filwyr, a'u teuluoedd.

 

3.     Bydd argaeledd data o'r fath yn cynorthwyo'r cyngor, asiantaethau partner lleol, y sector gwirfoddol, a Llywodraeth genedlaethol wrth gynllunio a darparu gwasanaethau i ddiwallu anghenion unigryw cymuned y Lluoedd Arfog yn Ninas a Sir Abertawe.

 

Yn sgîl yr uchod, mae'r cyngor hwn yn symud i gefnogi a hyrwyddo galwad Y Lleng Brydeinig Frenhinol i gynnwys pwnc newydd yng nghyfrifiad 2021 sy'n ymwneud â'r gwasanaeth milwrol ac aelodaeth gymuned y Lluoedd Arfog. Rydym ni hefyd yn galw ar Lywodraeth y DU, a fydd yn cymeradwyo holiadur terfynol cyfrifiad drwy ddeddfwriaeth yn 2019, i sicrhau bod cyfrifiad 2021 yn cynnwys cwestiynau ynglŷn â chymuned y Lluoedd Arfog.

 

 

Cynigiwyd y cynnig canlynol gan y Cynghorwyr J E Burtonshaw ac R C Stewart.

 

"Sicrhau bod y cyfrifiad nesaf yn cyfrif ar gyfer cymuned y lluoedd arfog yma

 

Cynnig i gefnogi ''Count Them In' (Cyfrifwch Nhw)

 

Noda'r cyngor:

 

1.            Ei rwymedigaethau i gymuned y Lluoedd Arfog yn Ninas a Sir Abertawe fel y'u corfforir yng Nghyfamod y Lluoedd Arfog; na ddylai cymuned y Lluoedd Arfog wynebu anfantais o ran y gwasanaethau a ddarperir a bod ystyriaeth arbennig yn briodol mewn rhai achosion, yn enwedig i'r rhai sydd wedi rhoi'r mwyaf.

 

2.            Absenoldeb ystadegau penodol a chynhwysfawr am faint neu ddemograffig cymuned y Lluoedd Arfog yn Ninas a Sir Abertawe. Mae hyn yn cynnwys personél rheolaidd ac wrth gefn, cyn filwyr a'u teuluoedd.

 

3.            Byddai argaeledd data o'r fath yn cynorthwyo'r cyngor, asiantaethau partner lleol, y sector gwirfoddol a'r Llywodraeth genedlaethol yn fawr wrth gynllunio a darparu gwasanaethau i fynd i'r afael ag anghenion unigryw cymuned y Lluoedd Arfog yn Ninas a Sir Abertawe.

 

O ystyried yr uchod, mae'r cyngor yn cynnig cefnogi a hyrwyddo galwad y Lleng Brydeinig Frenhinol i gynnwys maes newydd yng nghyfrifiad 2012 sy'n ymwneud â gwasanaeth milwrol ac aelodaeth cymuned y Lluoedd Arfog. Rydym hefyd yn galw ar Senedd y DU, a fydd yn cymeradwyo holiadur terfynol y cyfrifiad drwy ddeddfwriaeth yn 2019, i sicrhau bod cyfrifiad 2012 yn cynnwys cwestiynau sy'n ymwneud â chymuned y Lluoedd Arfog."

 

PENDERFYNWYD cymeradwyo'r cynnig fel yr amlinellir uchod.